A veciñanza de Ames mobilizarase de novo este domingo, 8 de setembro, cunha nova manifestación baixo o lema “Lei Animal Ames Xa!”, reclamando a correcta execución da lei de benestar animal por parte do Concello. A concentración comezará ás 12:00 horas na Casa da Cultura de Milladoiro e rematará en Manuel Murguía, co obxectivo de visibilizar a insatisfacción coas políticas municipais en materia de protección animal.
Segundo destacan os organizadores, esta manifestación é unha resposta á “falta de actuación efectiva e transparencia” do Concello de Ames en relación ao cumprimento da lei de benestar animal. As queixas principais inclúen a ausencia dun rexistro e control das colonias felinas, a inexistencia de convenios con veterinarios locais para abaratar os custos de xestión, e a falta dun servizo de lacería permanente que non recaia unicamente no voluntariado de Protección Civil.
Ademais, os convocantes subliñan a falta de claridade sobre o destino dos animais recollidos no concello e a escasa transparencia na xestión dos fondos europeos e estatais destinados a este fin. “Queremos lembrar o incumprimento da lei e a reiterada indiferencia da administración local”, declara unha das veciñas organizadoras, Eva, quen tamén critica a falta de campañas de concienciación e esterilización, a pesar de que están recollidas na normativa vixente.
A comunidade científica e ecoloxista apoia a implantación do método CER (captura, esterilización e retorno) como a mellor práctica para o control das colonias felinas, método que, segundo denuncian os veciños, apenas se aplica no municipio. A situación agrávase coa falta de servizos de urxencia veterinaria 24 horas, o que deixa aos animais e aos propietarios desprotexidos en caso de accidente ou extravío.
Os manifestantes tamén cuestionan a eficiencia dos recursos municipais destinados a iniciativas como os iglús para gatos, que consideran ineficaces. “No artigo 22 da nova lei obrígase aos concellos a estar preparados para atender calquera animal. Queremos un Ames 10 en protección animal, que sexa un referente de benestar,” conclúen.
A manifestación deste domingo espera reunir a veciños de Milladoiro, Bertamiráns e aldeas colindantes, sumando voces para esixir unha mellor xestión e un compromiso real coa protección dos animais no concello de Ames.
