O Concello de Ames presentou esta mañá as xornadas ‘Volta ao cole co comercio‘, que terán lugar os días 4 e 6 de setembro no Milladoiro e en Bertamiráns, respectivamente. O obxectivo desta iniciativa é dinamizar o comercio e a hostalaría local nos días previos ao inicio do curso escolar. A programación inclúe actividades lúdicas para nenos e nenas a partir dos 3 anos, así como sorteos de vales de compra valorados en 1.500 euros, en colaboración coa Xuntanza de Empresarios de Ames (XEA) e co patrocinio de Evoa Redes SL.
As actividades desenvolveranse en horario de 17:00 a 20:00 horas na zona verde da travesía do Porto, no Milladoiro, e no parque do Ameneiral, en Bertamiráns. Entre as propostas destacan inchables, xogos do mundo e unha Holi Party para a mocidade, que terá lugar a partir das 19:30 horas. A empresa Evoa Redes SL tamén estará presente cun stand para dar a coñecer o seu traballo á veciñanza.
A concelleira de Promoción Económica, Ana Belén Paz, destacou durante a presentación que “estas xornadas buscan dinamizar as rúas de Ames e promover o comercio local a través de actividades pensadas para toda a familia”. Pola súa banda, Carmen Porto, concelleira de Mocidade, subliñou a importancia de apoiar ás familias neste momento do ano: “A volta ao cole supón un gran desembolso económico, e esta festa é unha oportunidade para facilitarlles as compras no comercio local”.
O presidente da XEA, Ramón Cordido, aplaudiu a iniciativa e recalcou que “estes actos na rúa lembran á veciñanza que todo o que necesitan para comezar o curso está ao seu alcance”. Denís Gasamáns, director comercial de Evoa Redes SL, agradeceu a colaboración do Concello de Ames e das concellarías implicadas por facilitar a volta ao cole das familias do municipio.
Os sorteos de vales de compra realizaranse ao remate das actividades, ás 20:00 horas, e incluirán vales para diversas librerías e papelerías de Bertamiráns e do Milladoiro, ademais de vales cortesía do Concello de Ames e da XEA.
