A parroquia da Ameixenda inicia este venres 23 de agosto as festividades dedicadas á súa patroa, Santa Mariña, que se prolongarán ata o domingo 25 de agosto. As celebracións terán lugar no campo da festa da parroquia e contan coa colaboración do Concello de Ames.
A xornada inaugural incluirá unha misa solemne a partir das 13:00 horas en honra da Virxe das Dores e de Santa Mariña. Seguirase cunha sesión vermú amenizada polo grupo Dúo Musical. Xa pola noite, a festividade continuará cunha verbena organizada polas orquestras Finisterre e Fussión.
O sábado 24 de agosto, as festividades comezarán cunha misa cantada polo coral de Tapia en honra do Santísimo Sacramento ás 13:00 horas. A continuación, terá lugar un pasarrúas co grupo tradicional Os Retranqueiros e a sesión vermú contará coa actuación do grupo Soprano. Pola noite, a orquestra Ritmo Bakano, que chega dende As Palmas de Gran Canaria, ofrecerá un espectáculo de ritmos latinos, seguido de novo pola actuación de Soprano. A noite pecharase cun espectáculo de fogos de artificio ás 00:00 horas.
O domingo 25 de agosto, as festas rematarán cunha misa en honra da Virxe do Rosario, cantada pola coral Amigos de Javier Otero. Posteriormente, haberá outro pasarrúas con Os Retranqueiros e sesión vermú co grupo Mar de Arousa. O fin de festa estará a cargo do grupo A Banda da Balbina, que actuará ás 20:00 horas, seguido novamente por Mar de Arousa. Durante toda a xornada, tamén haberá inchables para os máis pequenos.
