O Concello de Ames disporá de 986.033,68 euros para a execución de novas obras grazas ao POS+ Adicional 2/2024 da Deputación da Coruña. Esta contía destinarase a sufragar cinco proxectos, entre os que se inclúen a pavimentación de viarios, a mellora da seguridade viaria e a rehabilitación de infraestruturas municipais.
Segundo o concelleiro de Obras e Servizos Básicos, Gustavo Nieto, “tiñamos moi claro que a senda dende A Ponte Maceira ata Carballo se ía a executar, e agora faremos realidade ese proxecto a través do POS Adicional 2/2024”. Este plan adicional inclúe proxectos financeiramente sostibles que xa estaban no Plan complementario, permitindo unha maior axilidade na súa implementación.
Proxectos sufragados co POS+ Adicional 2/2024
A primeira fase do POS+ Adicional cubrirá catro obras principais:
- Pavimentación de viarios no Castro de Ortoño (149.608,76 euros).
- Senda desde A Ponte Maceira a Carballo (268.737,99 euros).
- Mellora da seguridade viaria en Covas (128.415,69 euros).
- Pavimentación de viarios en Biduído de Arriba (185.104,42 euros).
Estas catro obras suman un total de 731.866,86 euros. Os 254.166,82 euros restantes destinaranse a melloras no edificio da Escola Municipal de Música e de Protección Civil en Aldea Nova, incluíndo a renovación da cuberta e a preparación para unha futura comunidade enerxética.
O alcalde, Blas García, destacou a importancia do apoio da Deputación da Coruña, afirmando que “o entre provincial leva investido en Ames máis de 2 millóns de euros este ano. Sen este apoio, as entidades locais terían dificultades para realizar melloras significativas”.
TOTAL DE INVESTIMENTOS NO CONCELLO
O importe total asignado a Ames en 2024, sumando as achegas do POS+ Adicional e do POS+ 2024, ascende a 1.965.534 euros. Estes fondos permitirán ao concello acometer importantes melloras en infraestruturas, beneficiando directamente á veciñanza e mellorando a calidade de vida na área.
A aprobación destas obras e proxectos foi unánime no pleno ordinario de xullo, reflexando o compromiso da corporación municipal en seguir avanzando no desenvolvemento e modernización do municipio.
