O Milladoiro prepárase para acoller a décimo terceira edición do festival Millarock, que terá lugar este venres 2 de agosto. O evento, organizado polo departamento de Cultura de Ames coa colaboración da Deputación da Coruña e a Xunta de Galicia, é unha das citas musicais máis destacadas do concello e busca promover o rock galego e apoiar grupos emerxentes da contorna.
O festival, con entrada libre e gratuíta, contará con dous escenarios situados no anfiteatro do Milladoiro e no aparcadoiro da Travesía do Porto. A programación inclúe tanto bandas consolidadas como novos talentos, garantindo unha oferta musical diversa e atractiva.
O cartel deste ano inclúe actuacións de Dakidarría, Agoraphobia, Biribirlocke e Onda Dagda, ademais das actividades organizadas pola escola A Casa do Rock, que ofrecerá concertos didácticos e obradoiros musicais para os máis novos. A xornada comezará ás 19:00 horas no anfiteatro do Milladoiro cun concerto didáctico e un obradoiro musical “Sube e Toca” ás 20:00 horas.
A partir das 21:00 horas, Onda Dagda, un grupo local que xa actuou en varios eventos organizados polo Concello de Ames, subirá ao escenario do anfiteatro. A continuación, ás 22:00 horas, o festival trasladarase ao aparcadoiro da Travesía do Porto, onde actuarán Biribirlocke, Agoraphobia e Dakidarría.
Biribirlocke iniciará as actuacións no novo escenario. Este grupo amesán, tras un período de pausa, volve con forza para presentar os temas do seu próximo disco. Ás 23:15 horas, será a quenda de Agoraphobia, unha banda de Boiro coñecida polo seu garaxe rock e potentes riffs. Finalmente, Dakidarría, con máis de 20 anos de traxectoria, pechará o festival co seu enerxético directo, presentando o seu novo disco “XX”.
