Este mércores o alcalde de Ames, Blas García, participou xunto ao presidente da Xunta de Galicia, Alfonso Rueda, e á conselleira de Economía e Industria, María Jesús Lorenzana, na visita á empresa D3 Applied Technologies, situada no parque empresarial do Milladoiro. A empresa é recoñecida a nivel mundial pola súa labor no desenvolvemento de solucións tecnolóxicas para embarcacións de competición, o sector aeronáutico, as enerxías renovables, a industria e o eido naval.
Durante a visita, o CEO de D3 Applied Technologies, Gonzalo Redondo, explicoulles ás autoridades o traballo do seu equipo, formado por científicos, enxeñeiros e colaboradores externos con ampla experiencia. Redondo destacou que a empresa aposta polos métodos numéricos e a simulación, desenvolvendo metodoloxías de deseño de última xeración e investindo en equipos de supercomputación para mellorar o rendemento dos seus deseños.
O alcalde Blas García agradeceu a presenza do presidente da Xunta e da conselleira de Economía e Industria, subliñando que “dispoñemos dun importante polo tecnolóxico e de innovación no parque empresarial do Milladoiro. Empresas como D3 Applied Technologies son un referente e permiten que dende O Milladoiro se traballe no deseño de barcos que compiten na Copa América ou nos Xogos Olímpicos”.
García engadiu que “Ames é as ás de Galicia, porque somos punteiros en innovación, tecnoloxía, comunicación e audiovisual, pero tamén a nivel demográfico, xa que somos o único concello galego con saldo vexetativo positivo”. Aproveitou tamén para solicitar a colaboración da Xunta para que Ames continúe avanzando e para que empresas como D3 sigan medrando.
O presidente da Xunta, Alfonso Rueda, destacou o papel dos emprendedores na xeración de emprego de calidade e a creación de riqueza. Subliñou que a Xunta está comprometida co apoio ás iniciativas empresariais a través da Oficina Económica de Galicia, que busca facilitar os trámites burocráticos e proporcionar axudas para multiplicar as oportunidades empresariais.
Rueda tamén salientou a aposta da Xunta por reter o talento innovador e atraer investimentos, mencionando medidas como a Rede de Polos de Emprendemento e liñas de axudas para startups. O Goberno autonómico traballa desde hai anos para reducir e axilizar os trámites empresariais, con iniciativas como a Oficina Económica de Galicia e diversas liñas de axudas para fomentar a innovación e modernización no tecido produtivo.
Na visita, tamén participaron a concelleira de Promoción Económica e Innovación de Ames, Ana Belén Paz; e mailas voceiras dos grupos municipais do Partido Popular, Oliva Agra; Bloque Nacionalista Galego, Escarlata Pampín; e Espazo Común, Luísa Feijóo.
