Este sábado, 20 de xullo, ás 21:00 horas, o entorno histórico de Ponte Maceira, un dos pobos máis bonitos de España e ben de interese cultural (BIC) desde 2022, acollerá unha nova edición das ‘Noites en Vela‘. Este evento anual, que volve tras ser interrompido pola pandemia nos anos 2020 e 2021, é xa unha tradición consolidada no verán de Ames.
O alcalde de Ames e concelleiro de Cultura, Blas García, destacou que as ‘Noites en Vela‘ xa son un dos eventos tradicionais dos veráns de Ames. É un dos eventos que xunta máis xente entorno a un momento de grande beleza como é Ponte Maceira xunto ao río Tambre”.
O evento deste ano contará coa participación do coro local ‘Son Elas‘, un grupo integrado exclusivamente por mulleres de Ames, cuxo repertorio abarca desde a música clásica ata a contemporánea. Tras a súa actuación, o grupo galego ‘Lontreira‘ tomará o relevo para ofrecer unha mestura de ritmos que van dende a cumbia ata sons máis eléctricos.
A noite concluirá cun vibrante espectáculo pirotécnico, que iluminará o ceo sobre Ponte Maceira, creando un ambiente máxico para todos os asistentes.
A entrada ao evento é gratuíta, e a organización espera atraer a numerosos visitantes e residentes que desexen gozar dunha velada cultural única. Os interesados en obter máis información poden contactar co Concello de Ames a través do enderezo electrónico cultura@concellodeames.gal.
