O Concello de Ames iniciou este luns día 20 o prazo para solicitar os carnés de usuario das piscinas municipais descubertas de Bertamiráns e O Milladoiro. Os interesados poden descargar o impreso de solicitude na web municipal e envialo cuberto aos correos electrónicos deportes@concellodeames.gal ou deportes.milladoiro@concellodeames.gal. Os prezos dos carnés oscilan entre os 5 e os 20 euros dependendo das circunstancias de cada usuario. As piscinas municipais abrirán do 15 de xuño ao 15 de setembro, en horario de 11:00 a 21:00. O prazo de solicitude estará aberto ata o 14 de agosto.
Ante a próxima apertura das piscinas descubertas municipais de Bertamiráns e O Milladoiro, a Concellería de Deportes abriu este luns o prazo para obter o carné de usuario destas instalacións. Para solicitar a tarxeta é necesario presentar a solicitude cuberta, unha foto actualizada escaneada (tamaño carné por cada usuario novo ou se fose necesario renovala) e a folla de autoliquidación selada pola entidade bancaria.
A folla de autoliquidación pode solicitarse nas oficinas de recadación (en Bertamiráns, na praza da Horta de Abaixo, número 6; ou no Milladoiro, na rúa Viorneira, número 6) ou no correo electrónico ames@canaltributos.com. Para máis información, pódese chamar ao número 981 88 48 96. Os usuarios tamén poderán tramitar directamente a súa autoliquidación na Oficina Virtual Tributaria.
O Concello recomenda que, na medida do posible, as usuarias descarguen a documentación desde a páxina web e soliciten a folla de autoliquidación por correo electrónico para despois realizar o pagamento correspondente. Unha vez recibida toda a documentación, enviarase o carné actualizado nun documento PDF nun prazo de 5 días.
PREZO DOS ABONOS
Para este verán, ofértanse varios tipos de abono: o familiar de tempada (que inclúe pais e fillos menores de 18 anos, e engade aos fillos menores de 25 anos sen ingresos propios) custa 20 euros; o individual para toda a tempada é de 14 euros, e o abono de tempada para menores de 18 anos é de 7 euros.
Tamén haberá abonos mensuais, de 7 euros para maiores de idade e de 5 euros para menores de 18 anos. Os menores de 4 anos están exentos de pagamento. O terceiro irmán en abono, menor de 18 anos, terá unha redución do 50%. Ademais, existen exencións de taxas nos abonos sempre e cando se conte con informe de Servizos Sociais.
As persoas interesadas poden solicitar máis información chamando ao número 981 535 940 (oficina de Deportes do Milladoiro) ou ao 619 842 504 (oficina de Deportes de Bertamiráns) en horario de luns a venres, de 9:00 a 14:00. A apertura das piscinas descubertas municipais de Bertamiráns e do Milladoiro está prevista para o 15 de xuño. Permanecerán abertas ata o 15 de setembro, en horario de 11:00 a 21:00.
