Colectivos veciñais e particulares de Ames reclamaron explicacións ao Concello polo paradoiro de ‘Gordo’, un can que, segundo denuncian, fora atopado a finais de xullo nunha situación de abandono e que posteriormente foi devolto ás persoas responsables do animal por indicación da Administración local. Os denunciantes aseguran que, cando efectivos do Servizo de Protección da Natureza da Garda Civil (Seprona) acudiron a comprobar a súa situación, o can xa non se atopaba no lugar.
A denuncia pública parte dun grupo de veciños e particulares que sosteñen que o caso comezou o pasado 25 de xullo, cando unha persoa deu aviso sobre as condicións nas que se atopaba o animal. Segundo a versión trasladada polos colectivos, o can presentaba signos de desnutrición e deshidratación e permanecía nunha zona con feces, lixo e un forte cheiro.
Tras recibir o aviso, a empresa que presta o servizo municipal de lacería en Ames procedeu á recollida do animal. Porén, os denunciantes afirman que posteriormente o Concello deu instrucións para que ‘Gordo’ regresase coas persoas que estaban ao seu cargo.
Esta decisión provocou as protestas de particulares coñecedores do caso, que cuestionaron que o animal volvese ao mesmo lugar no que fora localizado e presentaron denuncias formais para que se investigasen tanto as súas condicións como as actuacións realizadas desde a súa recollida.
Sempre segundo a información facilitada polos colectivos, unha patrulla do Seprona desprazouse este luns, 31 de agosto, ata a propiedade co obxectivo de inspeccionar a situación e comprobar o estado do can. Foi entón cando, aseguran os denunciantes, os axentes constataron que ‘Gordo’ xa non se atopaba alí.
A ausencia do animal levou os veciños implicados no caso a reclamar que se determine canto antes onde se atopa e en que condicións está. Os colectivos manifestan a súa “máxima preocupación pola seguridade e o paradoiro de Gordo” e consideran necesario aclarar se a súa desaparición se produciu despois da devolución á propiedade e antes da intervención da Garda Civil.
Reclaman coñecer quen decidiu a devolución
Entre as explicacións solicitadas ao goberno municipal está a identificación dos criterios empregados para autorizar o regreso do animal e das circunstancias nas que se adoptou esa decisión. Os denunciantes consideran que, ante os indicios que motivaran inicialmente a intervención do servizo de lacería, a prioridade debería ter sido garantir a protección do can mentres se esclarecía a súa situación.
Os colectivos piden tamén que o Concello informe das actuacións realizadas desde que tivo coñecemento do primeiro aviso e das posibles medidas adoptadas unha vez coñecida a ausencia do animal. Ao mesmo tempo, reclaman un “esclarecemento total” do seu paradoiro.
A denuncia veciñal amplía as críticas á política municipal de protección animal e sostén que o sucedido con ‘Gordo’ non sería un episodio illado. Os promotores da protesta apuntan tamén á xestión dos gatos comunitarios no rural de Ames, ámbito no que aseguran ter detectado problemas de atención e discrepancias entre as actuacións comunicadas polo Concello e as que, segundo a súa versión, chegaron finalmente a executarse.
En concreto, sosteñen que nalgunhas colonias se comunicaron intervencións relacionadas con servizos veterinarios ou de lacería que a propia veciñanza afirma non ter constatado posteriormente. Por este motivo, solicitan maior transparencia sobre os recursos municipais destinados ao benestar animal e sobre a execución efectiva das actuacións anunciadas.
