A deputada do BNG no Parlamento galego, Saleta Chao, reclamou á Consellería de Educación a posta en marcha dun plan de intervención integral e urxente para solucionar as deficiencias estruturais que, segundo denunciou, afectan a varios centros educativos de Ames e comprometen “a seguridade, salubridade e benestar” da comunidade escolar.
Durante unha intervención na Comisión de Educación, Chao situou o foco na situación da Escola de Educación Infantil do Milladoiro, o CEIP de Ventín, o CEIP da Maía, a escola unitaria da Igrexa e o CEIP de Barouta, onde sinalou a existencia de filtracións e humidades persistentes, cubertas deterioradas, problemas de accesibilidade, riscos en caso de evacuación e deficiencias en instalacións básicas como os baños, cuestións que, segundo expuxo, levan anos sen unha resposta suficiente por parte da administración autonómica.
A parlamentaria nacionalista subliñou que Ames é un dos concellos galegos con maior crecemento demográfico e cunha elevada presenza de poboación infantil e xuvenil, polo que considerou “inaprazable” que a Xunta avance tanto na creación de novas infraestruturas, como o demandado novo colexio do Milladoiro, como na conservación e mellora dos centros xa existentes.
Chao criticou tamén a falta de continuidade en actuacións xa iniciadas, citando como exemplo a substitución da cuberta no Milladoiro, e lamentou que outras reivindicacións históricas, como as do CEIP da Maía desde 2019, continúen sen solución definitiva. Neste contexto, respondeu ás críticas formuladas desde a Consellería sobre o seu labor de control parlamentario, defendendo que “vimos porque as comunidades educativas nos trasladan unha realidade. O noso traballo é controlar e preguntar que está a facer a Xunta”.
A deputada insistiu en que determinadas actuacións, como a renovación de cubertas con filtracións xeneralizadas, “non son simples tarefas de mantemento”, senón intervencións estruturais que competen directamente á Administración educativa, polo que instou á Consellería e á Vicepresidencia a elaborar un diagnóstico rigoroso e executar as reparacións necesarias sen máis demora.
Pola súa banda, a voceira do BNG de Ames, Escarlata Pampín, agradeceu a implicación de Saleta Chao por trasladar ao Parlamento a situación dos centros e puxo en valor a importancia de facer visibles estas carencias para situalas no centro da axenda política. Pampín defendeu que a comunidade educativa do municipio “merece instalacións dignas e seguras” e reclamou ás administracións competentes unha resposta efectiva ante unhas demandas que, segundo lembrou, se arrastran desde hai anos.
