A Garda Civil detivo a un home e a unha muller como presuntos autores dun delito de homicidio en grao de tentativa relacionado cun apuñalamento ocorrido en Bertamiráns, no concello de Ames. A investigación foi desenvolvida polo Equipo Territorial de Policía Xudicial (ETPJ) da Garda Civil de Santiago de Compostela.
Segundo informou o instituto armado, os feitos producíronse o 19 de febreiro arredor das 20:30 no parque Pazo da Peregrina. A investigación iniciouse tras a agresión sufrida por un home, que resultou ferido por arma branca durante unha pelexa.
De acordo coas pescudas realizadas polos axentes, o incidente comezou cunha discusión entre a detida e outro home. Nun determinado momento, a muller chamou a un terceiro implicado, tras o que ambos os dous homes iniciaron unha pelexa na que se empregaron coitelos. Posteriormente sumáronse á agresión a propia detida, o seu fillo e outra persoa máis.
Durante a confrontación, a muller exhibiu un coitelo de cociña e cravoullo á vítima en varias ocasións no tórax, segundo a información facilitada pola Garda Civil. Tras a agresión, os catro implicados abandonaron o lugar, mentres o ferido quedou tendido no chan sangrando abundantemente.
Pouco despois chegaron ao parque unha patrulla da Policía Local de Ames e outra da Garda Civil, alertadas polos veciños. Os axentes realizaron unha primeira intervención para taponar as feridas ata a chegada dos servizos sanitarios, que trasladaron o ferido ao Complexo Hospitalario Universitario de Santiago (CHUS).
A investigación permitiu identificar os presuntos agresores, que segundo a Garda Civil son persoas coñecidas polas forzas de seguridade por distintos ilícitos. Como resultado do operativo, foi detida a muller e o seu fillo, mentres se puxo en marcha un dispositivo para localizar os outros dous implicados.
Os detidos foron postos a disposición do Tribunal de Instancia Sección Civil e Instrución Praza nº 2 de Santiago de Compostela, que decretou o seu ingreso en prisión provisional. Pola súa banda, os outros dous implicados presentáronse posteriormente ante o mesmo xulgado, que acordou a súa liberdade con cargos.
