O Concello de Ames celebrará este martes 18 de novembro ás 10:00 un pleno extraordinario no que se someterá a debate a aprobación dun suplemento de crédito destinado a impulsar unha nova edición dos Bonos Consuma, a iniciativa municipal orientada a reforzar o comercio de proximidade e que leva catro anos en funcionamento. A sesión poderá seguirse en directo a través da canle institucional de YouTube.
A proposta presentada polo Goberno local prevé habilitar 60.000 euros adicionais, unha cuantía que non figuraba no orzamento prorrogado e que require, por tanto, da incorporación de novos recursos. O suplemento financiaríase con 20.000 euros procedentes de crédito non utilizado na convocatoria de subvencións de promoción comercial e con 40.000 euros do remanente de tesourería para gastos xerais. O obxectivo é activar a campaña antes de final de ano, coincidindo co Nadal, un momento no que o Executivo considera estratéxico incentivar que a veciñanza realice as súas compras no municipio.
O programa dos Bonos Consuma está concibido para favorecer as vendas do pequeno comercio e fortalecer a súa capacidade de atracción, nun contexto no que o Goberno municipal insiste na importancia do sector como motor económico e elemento de cohesión social. A previsión é que a nova edición contribúa a manter o nivel de actividade dos establecementos amesáns e a evitar o desprazamento de consumidores cara a outros concellos da área.
Ademais, durante o pleno darase conta da renuncia de Carmen Porto Rey, concelleira de Planificación e Xestión Educativa e Mocidade. A Corporación informará oficialmente da súa marcha, o que abrirá o proceso para cubrir a vacante no grupo de goberno.
