O Concello de Ames condenou este luns un acto vandálico cometido durante a fin de semana na pista municipal de pádel do Milladoiro, onde unha ou varias persoas lanzaron pedras contra os vidros da instalación, provocando a rotura de dous paneis. O suceso tivo lugar na zona norte da localidade, entre as rúas do Muíño Vello e do Buxo, e xa foi posto en coñecemento da Garda Civil do Milladoiro, que investigará o ocorrido.
Segundo informou o goberno local, a rotura dos cristais deixará a pista fóra de servizo ata que poidan realizarse os traballos de substitución, cun custo estimado de 1.900 euros a cargo dos fondos municipais. A Policía Local acordou o espazo con cintas de seguridade para evitar posibles danos a persoas usuarias ou transeúntes.
A concelleira de Deportes, Susana Señorís, cualificou o suceso de “acto incívico” e lembrou que “é responsabilidade de todos e todas coidar as nosas instalacións deportivas municipais”. Engadiu que o Concello “presentará a correspondente denuncia” e expresou o desexo de que se identifique “o autor ou autores deste acto vandálico para que non quede impune”.
A pista afectada é unha das tres instalacións municipais de pádel das que dispón Ames, xunto ás situadas en Bertamiráns e na urbanización Aldea Nova. Dende o goberno local fixeron un chamamento ao civismo e ao “bo uso” das infraestruturas públicas, lembrando que a súa conservación depende da responsabilidade colectiva de toda a veciñanza.
