A formación UCIN Ames, a través do seu coordinador José Luis Calo, criticou este martes a “deixadez” e a “falta de responsabilidade” do Goberno municipal de Ames e do alcalde Blas García pola situación de colapso circulatorio e “inseguridade” que, segundo denuncian, se vive na localidade de Milladoiro a causa das obras na Avenida Rosalía de Castro.
Calo sinala que os problemas de tráfico son especialmente graves en puntos como a Travesía de Oporto, onde a diario se producen atascos, manobras perigosas e situacións de risco coincidindo coas horas de entrada e saída dos colexios. Nesta liña, denuncia a “ausencia total da Policía Local” nos tramos máis conflitivos e asegura que esta circunstancia “evidencia a falta absoluta de planificación e control por parte do Goberno local”.
Segundo UCIN, os veciños e veciñas de Ames están a sufrir as consecuencias dunha “mala xestión municipal” que “pon en perigo a súa seguridade e a dos seus fillos”. Por iso, o partido esixe ao alcalde que actúe “con responsabilidade” e adopte medidas urxentes e eficaces para garantir a seguridade viaria e cidadá mentres duren os traballos.
A formación tamén alerta dunha “crecente sensación de abandono e inseguridade” entre a poboación, que, segundo apuntan, se ve agravada polo “aumento de actos delituosos en distintas zonas do municipio”.
Finalmente, UCIN Ames insta o Goberno municipal a “escoitar as demandas dos veciños” e lembra que “a seguridade e o benestar da cidadanía deben ser unha prioridade, non unha opción”.
