A concelleira do BNG de Ames, Rosalía Seijas, manifestou a súa oposición á forma en que o goberno local pretende adaptar a ordenanza do lixo á normativa europea e estatal. Segundo explicou, “desde o BNG non dicimos que non hai que adaptar a ordenanza, pero non é de recibo impoñerlle á veciñanza un incremento do 75% na taxa cando seguen a atoparse cos mesmos colectores rotos, as mesmas frecuencias de recollida e as mesmas dificultades para reciclar”.
A edil lembrou que a directiva europea sobre residuos non só obriga a cumprir cos requisitos legais, senón que tamén promove a eficiencia na xestión, o aumento da recollida selectiva e o avance cara a unha economía circular. Seijas criticou que a proposta municipal “non incorpora medidas para modernizar o servizo, nin para implantar a recollida porta a porta, nin un plan serio de compostaxe, nin campañas de sensibilización e formación cidadá”. Ao seu xuízo, “esta non é unha ordenanza que mire ao futuro nin que aposte por un Ames máis sustentable e con mellores servizos”.
No mesmo sentido, a representante nacionalista destacou que o BNG sempre defendeu o modelo da Mancomunidade de Concellos da Comarca de Santiago, pioneira na reciclaxe en Galicia, mais insistiu na necesidade dunha auditoría económica e medioambiental da planta comarcal. “A nosa comarca chegou a estar entre os oito municipios que máis reciclan”, lembrou, engadindo que “nunca defenderemos un modelo cos ollos pechados e sen datos”.
Por último, Seijas atribuíu a situación actual da planta á falta de continuidade política: “Alternáronse as presidencias do PP e do PSOE e deixaron morrer o modelo”.
