As bibliotecas municipais de Ames retoman a súa programación de outono con novas propostas de animación á lectura destinadas ao público infantil e familiar. Entre outubro e decembro celebraranse sesións de contacontos e obradoiros creativos nas bibliotecas de Bertamiráns e O Milladoiro, con inscricións diferenciadas en cada espazo.
A primeira actividade do trimestre será o contacontos ‘Quen se esconde nestes contos?’, que se desenvolverá os días 14, 15 e 16 de outubro en Bertamiráns e os 28, 29 e 30 no Milladoiro, sempre a partir das 17:30 horas e dirixido a nenas e nenos de 3 a 8 anos.
Co gallo do Día da Biblioteca, que se celebra o 24 de outubro, as bibliotecas organizan tamén o obradoiro ‘Deseña a túa mochila’, pensado para crianzas de 3º a 6º de primaria. Terá lugar o venres 24 no Milladoiro e o sábado 25 en Bertamiráns, cun prazo de inscrición aberto do 13 ao 20 de outubro. Nesa mesma xornada entregarase o premio aos Superlectores 2025 e repartiránse marcapáxinas conmemorativos coas ilustracións gañadoras do concurso de debuxo infantil do pasado Día do Libro.
En novembro, a proposta será ‘Unha risa de contos’, prevista para os días 11, 12 e 13 en Bertamiráns e 25, 26 e 27 no Milladoiro. As inscricións poderán facerse do 3 ao 8 de novembro e do 17 ao 22, respectivamente. Ademais, celebrarase o obradoiro ‘Pequenos artistas. Descubrindo a Castelao’, no marco do Ano Castelao 2025, o venres 21 no Milladoiro e o sábado 22 en Bertamiráns, con inscrición do 10 ao 17 de novembro.
Xa en decembro, as bibliotecas pecharán o trimestre co contacontos ‘Un Nadal entre contos’ —os días 9, 10 e 11 en Bertamiráns e 16, 17 e 18 no Milladoiro— e co obradoiro de Nadal, o venres 12 no Milladoiro e o sábado 13 en Bertamiráns, cuxas inscricións estarán abertas do 1 ao 9 de decembro.
