A presa da Ponte Maceira, situada no río Tambre entre os concellos de Ames e Negreira e recoñecida como BIC (Ben de Interese Cultural), permanece deteriorada desde 2022 tras unha rotura que afectou á súa estrutura. O Concello de Ames denuncia agora a “inaceptable paralización” do proxecto de reparación por parte da ‘Consellería de Medio Ambiente, dirixida por Ángeles Vázquez, e reclama a posta en marcha inmediata das obras nun enclave que forma parte do Camiño de Santiago.
Segundo lembra o executivo amesán, a Xunta de Galicia comprometeu en 2022 a intervención a través de Augas de Galicia. En 2023 anunciouse un proxecto valorado en 392.000 euros, cun prazo de execución de cinco meses. A finais de agosto de 2023, a daquela conselleira de Infraestruturas, Ethel Vázquez, confirmou que o documento estaba en fase de supervisión e tramitación previa á licitación.
O consistorio asegura que, malia as comunicacións e peticións de reunión remitidas nestes dous anos, non obtivo resposta. A situación agravouse tras difundirse en medios que, para a área autonómica competente, a actuación “non é prioritaria nin urxente” e que “non hai data prevista de execución”. Para o Goberno local, estas afirmacións contradicen os anuncios realizados nos anos 2022 e 2023 e rompen o compromiso asumido con anterioridade.
No expediente municipal figuran varias xestións: o 31 de xullo de 2023 o alcalde Blas García interesouse polo estado do proxecto e recibiu contestación da entón conselleira Ethel Vázquez; o 14 de febreiro de 2024 enviouse un novo escrito reiterando a urxencia de iniciar as obras; o 17 de xuño de 2024 advertiuse do agravamento da situación e solicitouse reunión presencial; o 2 de setembro de 2024 presentouse por rexistro oficial outra solicitude de actualización dos prazos; e o 28 de maio de 2025 o Pleno de Ames aprobou por unanimidade unha declaración institucional para instar á execución do proxecto.
Desde o Concello de Ames rexeítase o que cualifica como cambio de postura tras o relevo no departamento, agora con Ángeles Vázquez á fronte, e fálase de “falta de respecto institucional” tras, din, “ignorar sistematicamente as comunicacións” remitidas polo municipio. O executivo local esixe explicacións á titular de Medio Ambiente e a activación inmediata da obra para preservar a integridade da presa, polas súas implicacións hidráulicas e polo seu valor patrimonial e paisaxístico no ámbito do Camiño de Santiago.
