O Concello de Ames vén de presentar a sexta edición do Certame ‘Galetiktokers’, impulsado polos departamentos de Mocidade e Normalización Lingüística. A iniciativa busca fomentar a creatividade entre a mocidade, promover a produción de contidos en galego e dar visibilidade á comunidade de creadoras e creadores na rede social TikTok.
O concurso está aberto a todas as persoas a partir dos 13 anos, distribuídas en dúas categorías: de 13 a 17 anos e a partir dos 18, sen límite de idade. Os vídeos, de entre 15 e 60 segundos, deben estar realizados en galego, empregando TikTok ou a ferramenta Reels de Instagram, e poden abordar calquera temática. O prazo para enviar as propostas remata o 30 de outubro, a través do correo electrónico galetiktokers25@gmail.com, xunto coa ficha de inscrición.
Este ano volveranse repartir seis premios de 300 euros cada un, dous outorgados polo xurado e un polo público en cada categoría. A votación popular terá lugar entre o 5 e o 7 de novembro no perfil de Instagram @xuventudeames, onde se contabilizarán os “gústame” recibidos polos vídeos admitidos.
A presentación do certame celebrouse no anfiteatro do Milladoiro, coa presenza do alcalde e concelleiro de Normalización Lingüística, Blas García; a concelleira de Educación e Mocidade, Carmen Porto; o gañador da pasada edición, Miguel Lesta; así como persoal técnico dos departamentos municipais implicados. García destacou que “o máis importante desta iniciativa é a defensa da nosa lingua e que as redes se enchan de participación e vídeos en galego”.
Pola súa parte, Carmen Porto salientou que o concurso “serve non só para promover o uso do galego, senón para potenciar a creatividade da mocidade”. O creador de contido Miguel Lesta engadiu que “se a rapazada ve que facer contido en galego é normal e divertido, animarase a incorporalo nas súas vidas”.
A programación completarase con obradoiros nos institutos do Milladoiro e Ames, impartidos polo creador Miguel Barbazán Lesta (@miguelblesta), gañador do certame en 2024, quen explicará o funcionamento do concurso e presentará exemplos de contidos en galego na plataforma.
A gala de entrega de premios celebrarase o 22 de novembro de 2025, cunha dotación total de 1.800 euros.
