O coordinador de UCIN Galicia, José Luis Calo, manifestou a súa “profunda preocupación” polo desenvolvemento das obras da Avenida Rosalía de Castro, no núcleo do Milladoiro. Segundo sinalou, os traballos estanse a executar con “improvisación e falta de rigor técnico”, afastándose do proxecto inicial aprobado.
A formación denuncia que se están a empregar materiais inadecuados, que apareceron defectos de acabado e mesmo estruturais, e que non se estaría cumprindo co estipulado no contrato. “O resultado final que se albisca é dunha calidade moi baixa, con risco de que acabe sendo unha infraestrutura insegura e potencialmente inútil para os veciños e veciñas do Milladoiro”, advertiu Calo.
UCIN lembra que as queixas veciñais se teñen multiplicado nas últimas semanas, chegando mesmo á prensa comarcal, con denuncias polo malestar e a indignación xerada por unhas obras que, en lugar de mellorar a calidade de vida, están a xerar preocupación e inseguridade.
Ante esta situación, o partido reclama transparencia, control e responsabilidade na xestión do proxecto, lembrando que se trata de investimentos sufragados cos recursos públicos da veciñanza, polo que “non se pode xogar coa seguridade nin coa confianza da cidadanía”.
