O Concello de Ames súmase un ano máis á iniciativa ‘Móllate polos ríos’, organizada pola asociación ADEGA dentro do programa Proxecto Ríos. A convocatoria terá lugar este domingo, 21 de setembro, cunha limpeza do rego do Ameneiral que se desenvolverá entre as 11:00 e as 13:00 horas.
As persoas interesadas deberán achegarse á praza do Concello en Bertamiráns, onde se dará a benvida aos participantes e se organizarán os grupos de traballo. A acción, coordinada pola Concellaría de Xestión do Medio Natural e Atención ao Rural, busca eliminar lixo dos cursos fluviais e concienciar sobre a súa conservación.
O concelleiro Javier Antelo subliñou que “a auga é o ben máis prezado que temos, estas limpezas son de máxima importancia” e destacou a necesidade de implicar á mocidade. O lixo recollido será posteriormente clasificado e depositado nos contedores adecuados, e os datos achegados a ADEGA para elaborar un informe sobre o estado dos ríos galegos.
Desde o Concello recoméndase levar calzado e roupa resistente, así como luvas, para maior seguridade durante a actividade. Ao finalizar, realizarase unha posta en común cos resultados da limpeza e farase un rexistro fotográfico para difundir a acción.
