O Concello de Ames acolleu esta semana a recepción oficial dos oito nenos e nenas saharauís que participaron no programa ‘Vacacións en Paz 2025’, impulsado pola Asociación Solidariedade Galega co Pobo Saharauí (SOGAPS). Estes menores, procedentes dos campamentos de refuxiados de Tindouf, viviron durante os meses de xullo e agosto con familias amesás, ás que se unirá de novo unha despedida emotiva antes de que regresen ao Sáhara os días 5 e 6 de setembro.
Nesta edición repetiron os rapaces Jalihena, Hadi, Mohamed e Laraibi, e as rapazas Fadala, Zaina e Mariam, aos que se sumou Duaa, acollida por unha familia que participa por primeira vez. As familias amesás coincidiron en que “é unha experiencia marabillosa e moi enriquecedora que nos axuda a valorar máis o que temos e a ser persoas máis solidarias”.
A recepción tivo lugar no salón de plenos da Casa do Concello, coa presenza do alcalde Blas García, a concelleira de Benestar Social Uxía García, o técnico de integración social Leo Pena e representantes dos distintos grupos políticos municipais. Tamén participou a voceira de SOGAPS na comarca, Esther Ybarra.
O rexedor municipal puxo en valor a continuidade do apoio institucional: “O Concello de Ames leva colaborando moitos anos neste programa, independentemente de quen goberne. A labor das familias de acollida é vital e imos seguir colaborando, mesmo en maior medida se é posible”.
Pola súa parte, Uxía García destacou “a solidariedade das familias, sen as que non sería posible o programa”, e lembrou que ela mesma participa como acolledora. Esther Ybarra explicou que este verán 305 nenos e nenas están en Galicia co programa, maioritariamente repetidores, o que facilita a súa adaptación. “Aquí podemos ofrecerlles moitas cousas boas, pero non podemos substituír as súas familias. Mentres o Sáhara non sexa libre, SOGAPS seguirá traballando para darlles un verán diferente”, engadiu.
Ademais de compartir experiencias en Ames e noutros puntos de Galicia, os rapaces recibiron revisións médicas, aprenderon galego e castelán e gozaron de actividades de lecer. Antes da súa marcha, o Concello entregoulles unha mochila con material escolar e asumiu, como cada ano, o custe dos billetes de avión de ida e volta.
