O coordinador de UCIN Galicia, José Luis Calo, acusou este martes á Xunta de Galicia e ao Concello de Ames de manter a localidade do Milladoiro nun estado de “grave abandono”, poñendo como exemplo a situación de espazos públicos de uso diario.
Segundo explicou, a zona do Centro de Saúde presenta un “abandono absoluto” nas áreas axardinadas, tanto interiores como exteriores, con presenza de maleza e lixo e “sen un mínimo mantemento”. “Que imaxe se ofrece aos usuarios dun servizo sanitario esencial cando o primeiro que atopan é un entorno deixado e descuidado?”, cuestionou.
Outra das críticas céntrase nas aceras de acceso ao IES do Milladoiro e á piscina pública, empregadas por centos de estudantes e familias. Segundo UCIN, o mal estado do pavimento, con baldosas rotas e herbas que invaden os pasos, supón un “risco real para a veciñanza, especialmente para a xente maior e a mocidade”.
Calo reclamou unha actuación inmediata e coordinada das administracións para resolver estas deficiencias e advertiu que “non se pode seguir mirando para outro lado”. “Os veciños pagan impostos e o mínimo que merecen é camiñar con seguridade e acudir a un centro de saúde en condicións dignas”, subliñou.
UCIN Galicia anunciou que trasladará estas demandas ás instancias competentes e non descarta accións veciñais se a situación se prolonga. “O Milladoiro merece respecto”, concluíu Calo.
