O Concello de Ames anunciou que a actuación da orquestra ‘Olympus’ terá finalmente lugar o venres 19 de setembro, no aparcadoiro do SuperCor do Milladoiro, entre as 21:00 e as 00:00. O concerto, pensado como unha festa de despedida do verán, fora inicialmente programado como peche das festas da Madalena o pasado 5 de agosto, pero tivo que suspenderse debido aos fortes refachos de vento que impedían garantir a seguridade do público e do persoal técnico.
O evento enmárcase dentro do programa ‘Verán en Ames 2025’, que desde o mes de xuño reuniu preto de 50 actividades de carácter musical, cultural e de lecer. Entre elas destacan citas como o Ames en Festas, os Seráns de Ames, as Noites en Vela, o festival Ames Jazz, o Millarock, o acto do Día de Galicia, o concurso ‘Baila con Ames’, o festival ABANEA, o concerto de Mondra no Ameneiral ou as propostas da Semana da Mobilidade.
O alcalde, Blas García, salientou que a programación estival busca ofrecer alternativas de ocio para diferentes públicos: “Este ano imos despedir a programación de verán coa actuación da orquestra Olympus. Debido á cancelación o pasado 5 de agosto, decidimos programala para o 19 de setembro e así rematar a tempada cunha gran festa no Milladoiro”. García engadiu que a intención municipal é que “a veciñanza e as persoas da contorna desfruten das actividades, festexos e eventos organizados”.
O concerto da ‘Olympus’ está pensado tanto para público adulto como familiar, e rematará arredor da medianoite co obxectivo de compatibilizar a festa co descanso da veciñanza do Milladoiro.
