O Concello de Ames, a través da súa Concellaría de Deportes e Promoción da Saúde, continúa esta semana co ciclo de andainas ‘Camiñando no solpor’, unha iniciativa enmarcada nas actividades deportivas e terapéuticas de verán. A segunda das tres rutas programadas desenvolverase o xoves 21 de agosto no Milladoiro, con saída ás 20:00 desde o centro de saúde da localidade. A duración estimada é de arredor de dúas horas e a participación é gratuíta, sen necesidade de inscrición previa.
A serie de camiñadas, que se está a realizar ao longo do mes de agosto, combina percorridos polos núcleos principais do municipio: Bertamiráns e Milladoiro. A primeira tivo lugar o pasado 14 de agosto en Bertamiráns, cunha vintena de participantes que percorreron a ruta do rego dos Pasos, un sendeiro de catro quilómetros ida e volta entre Loureiros e Capeáns ata o muíño de Covas.
Estas andainas forman parte da programación de actividades de verán que organiza o departamento municipal de Deportes, centradas en propostas de carácter físico e terapéutico. Durante os meses de xullo e agosto desenvolvéronse tamén sesións abertas de ioga, ioga terapéutico, taichi-chikung e aquagym, todas elas de balde e sen trámite de inscrición, co obxectivo de fomentar hábitos saudables e o exercicio en grupo.
A terceira e última das andainas terá lugar a finais de mes, tamén dentro deste programa de promoción da saúde.
