O Concello de Ames volve instar á Xunta de Galicia a executar con urxencia a reconstrución da presa da Ponte Maceira, unha infraestrutura clave tanto desde o punto de vista do patrimonio como do abastecemento de auga á poboación. A estrutura, situada nun enclave declarado Ben de Interese Cultural (BIC) en 2017, leva deteriorada desde o ano 2022, cando se produciu unha ruptura que, segundo advirten dende o goberno local, está a afectar á contorna natural e ao nivel do río Tambre.
A situación non é nova. En agosto de 2023, a Xunta asegurara que o proxecto de reconstrución estaba xa na fase de “supervisión e tramitación”, cun orzamento estimado de 400.000 euros. Un ano despois, dende o consistorio amesán denuncian que non hai avances visibles. O alcalde, Blas García, insiste na importancia da intervención, cualificándoa de “imprescindible e inaprazable” pola súa dobre vertente: “conservación do patrimonio e garantía de abastecemento en caso de seca”.
O concelleiro de Obras e Servizos Básicos, Gustavo Nieto, aclara que, de momento, non existe risco de desabastecemento, xa que o nivel do río aínda supera en cinco centímetros a entrada da tubaxe de captación. Porén, sinala que o caudal é inferior ao habitual noutros veráns, algo que achaca directamente á ruptura da presa. Esta situación, di, podería agravarse nas vindeiras semanas se persiste a seca estival.
A preocupación pola conservación deste espazo tamén foi compartida polo Concello de Negreira, co que Ames vén mantendo comunicacións para reclamar a limpeza e restauración dos elementos patrimoniais da zona, como os muíños e os piares da ponte histórica. Ambos gobernos locais solicitaron reunións coa conselleira de Medio Ambiente e Cambio Climático, Ángeles Vázquez, co fin de coñecer as previsións da Xunta e esixir o cumprimento dos compromisos adquiridos.
O pasado mes de maio, o pleno do Concello de Ames aprobou unha declaración institucional por unanimidade de todos os grupos da Corporación. O texto reclama a execución inmediata do proxecto técnico comprometido en 2023, así como un plan de intervención integral para a contorna da Ponte Maceira.
Ao tempo que se esixen actuacións, o Concello e a empresa pública Augas de Ames lanzaron unha campaña de sensibilización baixo o lema “Cada gota conta”, coa que se anima á veciñanza a moderar o consumo de auga durante o que resta do verán. Recoméndanse medidas sinxelas como usar a ducha no canto da bañeira, empregar a lavadora a carga completa, limitar o rego ou revisar fugas nas instalacións domésticas.
“A día de hoxe non hai problema de abastecemento, pero é importante actuar con responsabilidade”, reiterou Gustavo Nieto, que apelou á conciencia cidadá para evitar situacións críticas nas semanas máis calorosas do ano.
