O coordinador de UCIN Galicia e candidato á alcaldía de Ames, José Luis Calo, denunciou publicamente a falta de operatividade da brigada municipal de prevención e extinción de incendios, que segundo lembra, xa debería estar en funcionamento nas datas actuais de verán.
Segundo expuxo a través dun comunicado, o Goberno local tivo a posibilidade de iniciar a contratación anticipada do persoal dende marzo, ao abeiro dunha nova vía habilitada pola Xunta de Galicia para este 2025, mais non o fixo. A resolución que confirmaba a concesión da subvención, sinala Calo, chegou en maio, e dende entón, “houbo tempo suficiente para completar calquera proceso de selección”.
Para o representante de UCIN, o feito de que a brigada municipal aínda non estea operativa non pode xustificarse como un atraso administrativo, senón como unha “irresponsabilidade” do equipo de goberno. “En lugar de actuar con previsión, o Goberno municipal esperou, improvisou e limitouse a presentar un plan nunha única reunión”, critica Calo, que pregunta abertamente “que impediu que se teñan xa catro persoas formadas e listas para actuar sobre o terreo”.
As críticas chegan nun momento no que as altas temperaturas e a seca incrementan o risco de incendios forestais na comarca, e cando xa se rexistraron incidentes de lume preto do territorio amesán. Neste contexto, UCIN insiste en que o municipio “non pode permitirse atrasos” na activación dos medios de protección e denuncia que a falta de acción “non é unha cuestión orzamentaria, senón de vontade política”.
Calo finaliza o seu comunicado lembrando que “isto non é política de partido”, senón unha cuestión de “seguridade, responsabilidade e coidado do ben común”, e reclama que se adopten medidas inmediatas para corrixir o que considera un erro de xestión nun servizo esencial en época de alto risco.
