O Concello de Ames sumouse este sábado á celebración do Día Internacional do Orgullo LGBTIQ+ cunha xornada de actividades no Milladoiro, que incluíu a lectura do manifesto institucional, a entrega do premio do concurso fotográfico LGBTIQ+ e distintos obradoiros e propostas para todos os públicos. A conmemoración, organizada polo departamento de Igualdade, desenvolveuse ao longo da mañá no Paseo da Igualdade, onde se reclamou a defensa dos dereitos do colectivo e a necesidade de loitar contra o discurso de odio.
O acto comezou ás 11:00 coa lectura do manifesto a cargo de representantes de distintos grupos políticos e do goberno municipal: o alcalde, Blas García, e as voceiras Oliva Agra (PP), Luísa Feijóo (Espazo Común), Escarlata Pampín (BNG) e Uxía García, concelleira de Benestar Social e Igualdade. O texto institucional fixo memoria do 20 aniversario da aprobación da lei do matrimonio entre persoas do mesmo sexo, destacando este fito como “un paso xigante cara á liberdade, á igualdade e á dignidade”.
Ao tempo, a declaración oficial puxo o foco nun contexto de aumento da violencia e dos discursos discriminatorios contra o colectivo LGBTIQ+ no Estado español durante este ano 2025. Neste sentido, alertouse da urxencia dunha resposta firme por parte das institucións e da sociedade. A concelleira Uxía García pechou a lectura cunha mensaxe contundente: “O odio non é unha opinión, é unha ameaza á convivencia. Desde Ames, hoxe dicimos con orgullo que somos terra de igualdade. Somos un concello diverso. Non daremos nin un só paso atrás”.
Tras o acto institucional, entregouse o premio do II Concurso Fotográfico LGBTIQ+, no marco da campaña ‘Ames a quen ames, faino con orgullo’. A gañadora foi a veciña do Milladoiro Paula Castiñeira Olveira, escollida entre as catro participantes desta edición. As outras persoas que presentaron imaxes foron Sergio Martínez Calvo, Camino Tellado Fernández —ambos tamén do Milladoiro— e María Porras Alcón, que concorreu dende Murcia.
Paralelamente, o paseo acolleu unha mañá festiva con música e obradoiros pensados para a participación cidadá, especialmente das familias e da infancia. Desenvolvéronse actividades como pintura de bolsas, decoración de pedras e mural colectivo, elaboración de pulseiras e espétadas de lambonadas, todo cun enfoque lúdico e reivindicativo arredor da diversidade e a igualdade.
A xornada completouse coa colocación de bandeiras coas cores do arco da vella en distintos espazos do municipio, como o Paseo da Igualdade no Milladoiro ou a rúa do Ameneiral en Bertamiráns. Ademais, o concello instalou un novo monolito en Costoia e un elemento decorativo na rúa de Abaixo, tamén no Milladoiro, como símbolo permanente do compromiso municipal coa defensa dos dereitos LGBTIQ+.
