O Concello de Ames reafirmou o seu compromiso coa solidariedade e a sanidade pública participando, por terceiro ano consecutivo, na Cea Solidaria Obra Social de Pediatría & Concello de Ames, que celebrou a súa terceira edición na noite do pasado sábado no Pazo da Peregrina de Bertamiráns.
O evento, que reuniu arredor de 150 persoas, permitiu recadar máis de 2.000 euros que serán destinados a dúas finalidades principais: apoiar proxectos de investigación médica e mellorar a calidade asistencial dos pacientes pediátricos do Complexo Hospitalario Universitario de Santiago (CHUS). A iniciativa conta co respaldo da entidade Obra Social Pediatría, impulsora das accións solidarias a prol da infancia hospitalizada, e foi organizada en colaboración coa Xuntanza de Empresarios de Ames (XEA) e a empresa Albarín Catering e Eventos.
Durante a velada, marcada por un ambiente de apoio mutuo e compromiso social, o alcalde de Ames, Blas García, quixo destacar a implicación do tecido local neste tipo de causas. “Ames é un concello solidario que terá sempre as portas abertas a este tipo de iniciativas”, afirmou.
A participación cidadá e empresarial foi clave para o éxito do acto, que se consolida como unha das citas anuais de carácter benéfico máis destacadas do municipio. Desde a organización salientan que esta colaboración entre administración local, sector privado e entidades sociais permite canalizar recursos e sensibilizar sobre a importancia de investir na saúde da infancia e no apoio ás familias afectadas.
