O Concello de Ames conmemora o Día Internacional do Orgullo LGBTIQ+ cunha programación especial o sábado 28 de xuño no Paseo da Igualdade do Milladoiro, organizada pola Concellaría de Benestar Social e Igualdade. As actividades comezarán ás 11:00 coa lectura do manifesto institucional, un acto simbólico co que se busca dar voz a representantes do colectivo local e reivindicar o dereito á diversidade.
Tras esta intervención, farase entrega do premio do concurso fotográfico LGBTIQ+, enmarcado na campaña ‘Ames a quen ames, faino con orgullo’, que promove o recoñecemento da pluralidade afectiva e sexual na sociedade amesá. Ao longo da mañá desenvolveranse tamén obradoiros para todos os públicos, pensados para favorecer a participación interxeracional en actividades creativas e lúdicas.
Entre as propostas destacan os talleres de pintura de bolsas, decoración de pedras, elaboración dun mural colectivo, confección de pulseiras e espetadas de lambonadas, actividades que procuran tanto o entretemento como a reflexión arredor da diversidade. Para pechar a xornada, arredor das 12:30, está prevista unha Holi Party, na que se utilizarán os cores da bandeira LGBTIQ+ como elemento de visibilización e celebración.
Durante a presentación da programación, a concelleira Uxía García sinalou que “un ano máis o concello de Ames súmase á celebración do 28 de xuño para visibilizar ao colectivo LGBTIQ+ e convidar a toda a veciñanza a participar nunha xornada inclusiva”. Pola súa banda, a técnica municipal Mónica Antelo subliñou que as actividades están deseñadas para facilitar a participación de toda a familia e rematarán cunha acción simbólica na que “se visibilizarán todas as cores da bandeira”.
O Concello insiste así no seu compromiso coa igualdade e a loita contra a discriminación, reforzando espazos de convivencia que recoñezan a pluralidade de identidades e orientacións sexuais no ámbito local. A cita no Milladoiro consolídase como un dos actos centrais desta reivindicación no municipio.
