O Goberno municipal de Ames fixo este luns un balance dos dous primeiros anos de lexislatura nunha comparecencia pública celebrada no salón de plenos da Casa do Concello. O alcalde, Blas García, e o voceiro do executivo, Víctor Fernández, compareceron arroupados polos sete concelleiros e concelleiras que integran o equipo de goberno, nun acto celebrado ás 10:30 coa intención de facer balance do mandato e reivindicar a estabilidade institucional.
O voceiro abriu a intervención destacando que “estes dous primeiros anos de mandato foron positivos”, salientando especialmente a “capacidade de consenso” que permitiu aprobar “a totalidade dos puntos levados a pleno”. Fernández sinalou que o modelo de xestión se basea na cooperación entre forzas políticas e co conxunto das administracións, o que facilitou o desbloqueo de proxectos e a captación de investimentos.
Pola súa parte, o alcalde Blas García fixo unha valoración das actuacións realizadas nas diferentes áreas municipais, reivindicando o traballo feito malia gobernar en minoría. Destacou, neste senso, que o Concello de Ames logrou executar máis do 80% dos 33 millóns de euros orzamentados, cun remanente de 6,5 millóns e un investimento real superior aos 7,5 millóns, “o máis grande da historia do concello”, segundo apuntou.
Entre as iniciativas pioneiras, García puxo o foco na creación da empresa pública Augas de Ames para a xestión do ciclo da auga, o Plan de Benestar Emocional e Saúde Mental ou a implantación das Comunidades Enerxéticas. Tamén subliñou o papel do municipio como referente de transparencia en Galicia, segundo o portal Dyntra, e a súa integración na Rede Impulso de innovación urbana.
No eido educativo, o alcalde remarcou que Ames xa cumpre practicamente todos os puntos da nova lei estatal de calidade alimentaria nas escolas. A posta en marcha dunha cociña central municipal, que entrará en funcionamento no vindeiro curso, permitirá unificar o servizo e mellorar a súa organización. Tamén se procedeu á actualización dos prezos dos servizos de conciliación, conxelados desde 2011, adaptándoos ao crecemento poboacional.
No que atinxe ao urbanismo e á mobilidade, a atención centrouse especialmente no núcleo do Milladoiro, onde se están a executar obras de humanización e se proxectan actuacións como un centro deportivo, un aparcadoiro e o remate do centro multifuncional. Tamén se está a traballar na obtención de solo edificable tanto nesta localidade como en Bertamiráns para favorecer a construción de vivenda.
Finalmente, García puxo en valor a aprobación da Axenda Urbana de Ames, que permitiu solicitar máis de 15 millóns de euros dos fondos europeos EDIL, e reivindicou o modelo de goberno en solitario como ferramenta para aplicar políticas progresistas en todas as concellarías. Rematou a súa intervención destacando que “Ames segue a medrar poboacionalmente e é un concello que cada vez máis persoas escollen para vivir”.
