O grupo municipal do BNG de Ames vén de denunciar publicamente o que considera un incumprimento reiterado do Regulamento Orgánico Municipal (ROM) por parte do alcalde, ao que acusan de non garantir un funcionamento democrático e equitativo do Pleno. A voceira nacionalista, Escarlata Pampín, advertiu de que “a negativa do alcalde a respectar o regulamento non só supón unha falta de respecto aos grupos da oposición, senón que deteriora gravemente o funcionamento democrático da Corporación e o dereito da veciñanza a unha representación política xusta e transparente”.
A formación esixe ao rexedor que cumpra e faga cumprir o ROM, vixente desde o ano 2016, no que se regulan os tempos de intervención e a orde das quendas no Pleno. Segundo lembra Pampín, a normativa establece criterios “obxectivos e igualitarios” para a participación dos distintos grupos, polo que non se pode permitir unha interpretación partidista por parte da presidencia da sesión plenaria.
Desde o BNG denuncian que o alcalde estaría intervindo de forma discrecional na distribución dos tempos de palabra, o que, ao seu xuízo, distorsiona o debate político no principal foro institucional do concello. “A presidencia do Pleno non pode actuar en función de intereses partidistas, xa que ‘o que parte e reparte, quédase coa mellor parte’, e iso non é admisible nunha institución democrática”, sinalan.
A formación nacionalista insiste en que o Pleno debe ser “o espazo central do debate político no Concello”, polo que urxe a recuperar uns procedementos transparentes e respectuosos cos dereitos da oposición, en lugar de prácticas que —segundo denuncian— minan a confianza da cidadanía nas institucións.
