O Concello de Ames iniciou contactos coa Zona Franca de Vigo para explorar vías de colaboración de cara á creación dun novo polígono empresarial en Bertamiráns. Así o trasladou o alcalde, Blas García, durante unha xuntanza institucional celebrada este mércores co Delegado Especial do Estado, David Regades, no Salón de Plenos da Casa do Concello.
O encontro serviu para presentar oficialmente o proxecto urbanístico, que ten como finalidade dar resposta á alta demanda de solo empresarial no municipio, especialmente no entorno de Bertamiráns, que vive un crecemento constante e sostido nos últimos anos.
Segundo explicou o rexedor, o Concello de Ames traballa xa nunha proposta para habilitar máis de 300.000 metros cadrados de superficie industrial, situados nunha zona estratéxica delimitada pola estrada AC-544 (Bertamiráns-Negreira), a autovía AG-56 Santiago-Brión e a contorna rural de Caroubáns.
A topografía da área, con pendente sur-norte e cotas entre 85 e 125 metros, e a súa proximidade ás principais vías de comunicación, convértena nunha opción atractiva para empresas locais e foráneas. O solo está actualmente clasificado como rústico, polo que o Concello xa contempla unha modificación do PXOM para adaptarse ao plan sectorial autonómico e habilitar o uso empresarial.
“Ames é un concello cun forte dinamismo económico e demográfico, e este proxecto permitirá consolidar ese crecemento de maneira sostible”, afirmou García, quen engadiu que a localización do futuro parque empresarial é ideal para favorecer a implantación de actividades comerciais, loxísticas e industriais lixeiras.
Pola súa banda, o delegado da Zona Franca de Vigo amosou disposición plena a colaborar e valorou positivamente a proposta do goberno local. “O Consorcio é un instrumento do Estado para impulsar a economía produtiva e apoiar a creación de solo industrial. O interese empresarial en Ames e o seu crecemento son elementos clave para avanzar neste proxecto”, declarou Regades.
O polígono de Bertamiráns non contempla usos vinculados á industria pesada, polo que manterá unha relación directa co núcleo urbano e favorecerá un modelo de desenvolvemento equilibrado, con usos autorizables de tipo terciario, comercial, almacenaxe e transporte.
A Zona Franca de Vigo, con case oito décadas de traxectoria, é unha entidade pública centrada no fomento do comercio internacional e o desenvolvemento empresarial no noroeste peninsular. A posibilidade de incorporar Ames ás súas iniciativas reforzaría a cooperación institucional entre entidades locais e estatais, así como a creación de emprego e oportunidades no sur da comarca de Santiago.
