O Concello de Ames reuniuse esta mañá coa Dirección Xeral de Mobilidade da Xunta de Galicia e coa empresa concesionaria Monbus para analizar o funcionamento da liña de autobús de interese municipal (SIMU) e estudar modificacións que melloren o servizo. A xuntanza, celebrada a raíz do número crecente de queixas veciñais, contou coa presenza do alcalde Blas García, o concelleiro de Mobilidade Víctor Fernández, a directora xeral de Mobilidade Judit Fontela e o presidente de Monbus Raúl López.
Durante o encontro, o Concello de Ames trasladou as principais demandas recollidas entre os usuarios e usuarias do servizo, implantado no ano 2022 para conectar as parroquias de Ortoño, Bugallido e Biduído con Santiago de Compostela, tras a desaparición da liña urbana P2, anteriormente xestionada polo Concello compostelán.
PETICIÓNS CONCRETAS DE MELLORA
Entre as propostas postas sobre a mesa pola administración local, destaca a reorganización das frecuencias da SIMU para evitar solapamentos coa liña de Extramundi, así como o establecemento de novas paradas no Hospital Clínico e no Campus Sur da USC, co obxectivo de responder á alta demanda de estudantes e persoas con citas médicas.
Ademais, o Concello solicitou a inclusión no percorrido das zonas de Fraíz e A Moniña, pertencentes á parroquia de Biduído, que quedaron sen cobertura de transporte público tras a supresión da antiga liña P2. Segundo explicou o alcalde, “é fundamental a ampliación desta liña para que tamén preste servizo á veciñanza de Fraíz e A Moniña”.
Outra das peticións trasladadas foi a necesidade de reforzar o control sobre o cumprimento dos horarios e do percorrido, un dos principais motivos de queixa da cidadanía usuaria, segundo indicou o Concello.
COLABORACIÓN INSTITUCIONAL
O convenio que deu lugar ao servizo SIMU foi asinado no mes de xuño de 2022 entre o Concello de Ames e a Xunta de Galicia, coa intención de mellorar a mobilidade interurbana e dar resposta ás necesidades de transporte nas parroquias do rural. A iniciativa contou nese momento co apoio unánime da Corporación municipal, ao ser aprobado en pleno no mes de abril dese ano.
O percorrido da liña municipal mantense entre Bertamiráns e a estación intermodal de Santiago, con paso por diversos puntos de Ortoño, Bugallido e Costoia, pero a experiencia dos últimos meses puxo de manifesto a necesidade de axustes e melloras na planificación.
Blas García expresou a súa confianza en que esta reunión marque “un punto de inflexión para resolver as deficiencias do servizo” e recalcou que “a confianza da veciñanza só se recupera cun servizo que cumpra horarios, que teña paradas útiles e que funcione de forma regular”.
