A Unidade de Cidadáns Independentes (UCIN) de Ames expresou a súa preocupación pola xestión do goberno local en materia urbanística, denunciando que a política de investimentos e proxectos en execución hipoteca o futuro do municipio. O coordinador de UCIN Galicia, José Luis Calo, criticou a falta de previsión na xestión e acusou o executivo municipal de levar a cabo obras de gran envergadura sen unha planificación clara.
Entre as actuacións mencionadas por UCIN, destacan a urbanización do PM5-03 do Milladoiro, diversas obras de pavimentación en zonas rurais, así como a falta de avances no Centro Multifuncional do Milladoiro, ao que consideran un dos proxectos con maior grao de neglixencia por parte do goberno local. Ademais, a formación subliña que moitos destes proxectos sufriron ralentizacións ou non foron executados, o que provocou a pérdida de fondos europeos destinados a infraestruturas municipais.
UCIN critica que o alcalde de Ames, Blas García, goberne segundo eles a golpe de Decreto, sen unha liña de actuación clara que garanta un desenvolvemento sostible do municipio. Segundo Calo, esta situación evidencia unha falta de previsión e xestión estratéxica na planificación urbanística de Ames, provocando que moitas das obras iniciadas sigan sen finalizar tras anos de espera.
