O Concello de Ames presentou esta mañá a súa programación cultural para a celebración de Santa Icía, patroa dos músicos, que terá lugar entre o 20 e o 24 de novembro. O alcalde e concelleiro de Cultura, Blas García, destacou que esta segunda edición busca ofrecer opcións culturais diversas e promover o talento musical local. Durante a semana, as actuacións de grupos e solistas de Ames, xunto con artistas recoñecidos, levarán música e danza ás casas da cultura do Milladoiro e Bertamiráns.
A semana comezará o mércores 20 de novembro ás 19:00 horas na Casa da Cultura do Milladoiro, coa actuación dos combos da Escola Municipal de Música de Ames (EMMA). Seguiralle o concerto de Luis Fercán o xoves 21, ás 20:30, en Bertamiráns, parte da súa xira ‘Postales perdidas’.
O venres 22, Héctor Rial presentará o seu espectáculo ‘Azúcar, pimienta y sal’, que traerá a Ames unha selección internacional de tangos, valses e milongas, acompañado de músicos, cantantes e bailaríns. Na fin de semana, o sábado 23 ás 19:00, o auditorio de Bertamiráns acollerá a actuación da coral de Bugallido xunto ao coro do Conservatorio de Maia e as pandeireteiras da Costaneira. O programa rematará o domingo 24, tamén en Bertamiráns, cunha velada de violín a cargo de Anxo Gómez Piñeiro e a pianista Haruna Takebe.
A programación cultural de Santa Icía 2024 é aberta a todo o público, coas entradas dispoñibles na billeteira electrónica do concello.
