A profesora Marta Lois González foi elixida como nova decana da Facultade de Ciencias Políticas e Sociais da Universidade de Santiago de Compostela, tras obter 20 votos na xunta de centro celebrada este venres. Lois tomará o relevo do profesor Ramón Bouzas, superando na votación á outra candidata, a profesora Erika Jaráiz Gulías, quen recibiu 10 votos.
No seu mandato, Lois estará acompañada por un equipo que describiu como “plural, de integración de todas as áreas da facultade”. O equipo está conformado por José Caamaño, de Economía Política, Amparo Novo, de Socioloxía, e Alba Alonso, de Ciencia Política.
Marta Lois, doutora en Ciencia Política, é profesora no Departamento de Ciencia Política e Socioloxía e forma parte da Rede Armela de investigación en igualdade, dereitos e estado social. A súa investigación céntrase en temas como a perspectiva de xénero, a análise das políticas públicas e a teoría política feminista. Os seus traballos foron publicados en revistas de referencia, destacando estudos sobre igualdade de xénero nas elites gobernamentais e nos parlamentos.
Lois tamén é coautora de libros destacados na disciplina, como Crisis, derechos sociales e igualdad, e coordinou a obra Ciencia política con perspectiva de género (Akal, 2014), que foi galardoada co Premio María Ángeles Durán de Investigación Científica.
