O Hotel Costa Vella celebrou este xoves o seu 25 aniversario cun evento privado na súa emblemática terraza. Os irmáns José Antonio e Ana Liñares, xunto con Roberto Sousa, organizaron un convite especial para agradecer a confianza de clientes, provedores e veciños. O acto tivo lugar no fermoso xardín do hotel, un espazo único coidado polos propios donos, que mestura diversas plantas e elementos históricos como a muralla medieval, creando un ambiente exclusivo no corazón de Santiago.
Os irmáns Liñares, con tradición hostaleira, iniciaron esta andaina en 1999 cando abriron as portas do que se convertería nun dos primeiros hoteis boutique da cidade. Segundo José Antonio, o éxito do hotel reside na conservación do seu patrimonio histórico: “Non é mérito noso, creouno a cidade, e nós estamos moi contentos de poder mantelo durante todo este tempo”.
A familia tamén xestiona outros dous establecementos, o Hotel Moure e o Hotel Altair, que seguen a mesma filosofía de ofrecer espazos exclusivos, centrados no deseño e na calidade, en lugar da cantidade de habitacións.
