Esta mañá, a directora das Aulas Senior de Galicia (ATEGAL), Paula Sande, mantivo un encontro co director xeral de Atención Integral Sociosanitaria, Antón Acevedo, para expoñer o programa que guiará o novo curso de formación permanente para persoas maiores. A través desta iniciativa, a Xunta de Galicia reafirma o seu compromiso co envellecemento activo, buscando ofrecer ás persoas maiores alternativas para vivir esta etapa de forma plena.
ATEGAL, que conta con sede en Compostela, na rúa Virxe da Cerca, rexistrou o pasado curso preto de 1.200 participantes nas súas aulas. Este ano, as primeiras previsións apuntan a un incremento significativo na participación. As inscricións para o curso 2024-2025 abriron este luns, cunha oferta variada de actividades distribuídas en áreas como a cultura, a saúde, o ocio e o desenvolvemento ocupacional.
Entre as novidades desta edición, os alumnos poderán beneficiarse das vantaxes do Carné +65 da Xunta de Galicia. Ademais, ATEGAL seguirá colaborando co proxecto Llenos de vida, impulsado pola Acción Social de CaixaBank, a través do cal se ofrecerán talleres gratuítos abertos ao público. Estas actividades estarán enfocadas no desenvolvemento persoal, competencias dixitais, actividade física e creatividade.
Segundo Paula Sande, o obxectivo principal de ATEGAL é “fomentar un estilo de vida activo e saudable na vellez, promovendo relacións interpersoais e loitando contra os estereotipos da idade”. A entidade tamén organiza ao longo do ano charlas, saídas culturais e eventos interxeracionais, reforzando así o seu papel como espazo para o desenvolvemento dos talentos das persoas maiores e a súa contribución á sociedade.
