Esta primeira fin de semana do curso universitario fixo repetir en Santiago as imaxes de longas colas e frustración entre os usuarios da estación intermodal, a maioría deles estudantes. Con trens completos nas liñas cara a Vigo e A Coruña, a alternativa foi o autobús, o que provocou un colapso nas taquillas da terminal de buses. A partir das tres da tarde, as colas superaban as dúas horas de espera e a indignación dos usuarios aumentaba ante a falta de respostas e reforzos no servizo.
Artai Bringas, un estudante que intentaba volver a Gondomar, explicaba ao diario La Voz de Galicia: “Pasei unha hora na ringleira e non cheguei nin ás taquillas”. Ante a falta de autobuses dispoñibles, decidiu chamar á súa familia para que o recollesen.
A situación foi agravada pola falta de información, xa que os afectados non conseguiron contactar coas empresas de autobuses nin presencial nin telefónicamente. Algúns viaxeiros que intentaron mercar os billetes por internet tamén atoparon dificultades técnicas.
Aínda que Renfe reforzou as prazas utilizando composicións dobres desde o luns, sindicatos denunciaron que o eixo atlántico conta con menos prazas dispoñibles debido a problemas de mantemento. As prazas para as horas punta están esgotadas ata novembro, en parte polo impacto dos máis de 80.000 abonos gratuítos emitidos en Galicia.
A Xunta, responsable do transporte interurbano, asegurou que enviou unha carta ás empresas concesionarias de autobuses solicitando atención ás necesidades de mobilidade dos estudantes, especialmente os venres e domingos. A Consellería de Presidencia admitiu atrasos nos embarques pola elevada demanda, mais negou que quedasen viaxeiros sen servizo.
TRENS Á CORUÑA NA PRÓXIMA FIN DE SEMANA
Durante os próximos días 21 e 22 de setembro (sábado e domingo), Renfe interrompirá o servizo de todos os trens que cheguen e partan da estación de San Cristovo na Coruña, na súa maioría os que conectan á cidade herculina con Santiago. Segundo afirmou Renfe, este servizo será prestado de xeito substitutorio en autobús, polo que aqueles viaxeiros que queiras viaxar a Compostela dende A Coruña poderán facelo unicamente por estrada.
