A secretaria adxunta de organización do PSdeG, Ana Pena, insistiu en que o expediente aos edís de Santiago compete ao órgano provincial do partido e defendeu que o secretario xeral, José Ramón Gómez Besteiro, “non ten ningún problema en falar con calquera militante”. Así se manifestou a preguntas dos medios en rolda de prensa tras a reunión da Comisión Executiva Nacional Galega e despois de que o concelleiro socialista da capital galega Gonzalo Muíños mostrouse disposto a sentar con Besteiro e que medie para resolver o conflito.
Con todo, Ana Pena reiterou que “no momento en que o expediente conclúa” será o órgano competente “o que faga as declaracións oportunas”. “Entendemos que se porán en contacto con eles cando o expediente avance, pero máis aló de dicir que pola nosa banda se garanta o cumprimento da normativa que marcan os estatutos, é competencia do órgano provincial e son eles os que teñen que dar a información correspondente”, aseverou.
Con anterioridade, este mesmo luns, o propio líder dos socialistas galegos tamén mantivo que a situación se atopa no órgano provincial e, engadiu, “é aí onde se debe resolver”. “Eu non quero condicionar en absoluto esta cuestión porque é interceder nun procedemento que está plenamente regulado nos nosos estatutos e eu non quero interferir niso”, sinalou Gómez Besteiro cuestionado en rolda de prensa este luns no Parlamento.
