Investigadores do Centro Singular de Investigación en Química Biolóxica e Materiais Moleculares (CiQUS) da Universidade de Santiago de Compostela (USC) demostraron que é posible controlar a liberación de fármacos encapsulados en polímeros mediante o emprego da luz, nun artigo asinado por Manuel Núñez-Martínez, Manuel Fernández-Míguez, Emilio Quiñoá e Félix Freire.
Os polímeros helicoidales poden organizarse e ensamblarse para formar nanoesferas e estas estruturas son capaces de encapsular outras partículas como as dos fármacos e actuar como potenciais transportadores a nivel molecular. A súa investigación mostrou que unha reacción fotoquímica pode provocar a degradación dos polímeros, liberando a carga que transportan, que no caso deste experimento eran diminutas partículas metálicas e fluorescentes.
O sentido de xiro e o grao de pliegue da hélice inflúen neste proceso: as hélices estiradas tardan máis en inmolarse baixo a luz que aquelas máis comprimidas. Deste xeito, os autores do traballo abren a porta para poder mesmo controlar de maneira gradual a cantidade de sustancia liberada, o que sería de gran interese para a entrega de fármacos.
Os resultados deste estudo, publicados na revista Angewandte Chemie, son un novo avance para comprender mellor os parámetros que gobernan o comportamento dos polímeros helicoidales. Cambiando e modificando eses parámetros é posible asignarlles a estes compostos distintas funcións de interese tanto no ámbito biolóxico como no dos materiais, e ampliar así o abanico de aplicacións.
