A sexta sección da Audiencia Provincial da Coruña, con sede en Santiago de Compostela, absolveu un home que estaba acusado dun delito de abusos sexuais a unha moza de 17 anos por uns feitos que terían ocorrido na capital galega o 13 de agosto de 2022.
A decisión recóllese nunha sentenza datada o 15 de setembro, da que informou este xoves o Tribunal Superior de Xustiza de Galicia (TSXG). Na resolución, a Audiencia conclúe que non existen elementos probatorios suficientes para condenar o acusado.
En concreto, os maxistrados sinalan que “non se dispón de proba de cargo suficiente para enervar a presunción de inocencia que ampara o acusado”. O tribunal tamén analiza o testemuño da denunciante e determina que a súa declaración non resulta suficiente por si soa para considerar acreditados os feitos polos que o home foi xulgado.
