O investigador Tomás Sobrino, director do Grupo de Neuroenvellecemento do Laboratorio de Investigación en Neurociencias Clínicas de Santiago (LINC), vén de incorporarse á asociación Galzheimer Care co obxectivo de reforzar a dimensión científica da entidade e impulsar novos ámbitos de investigación relacionados co Alzheimer e outras enfermidades neurodexenerativas.
A entidade pretende que a experiencia de Sobrino contribúa a achegar os avances científicos á realidade das persoas diagnosticadas e das súas familias, establecendo novas vías de traballo que conecten a investigación coas necesidades que xorden ao longo da evolución destas patoloxías. A incorporación permitirá tamén ampliar o labor de divulgación e transferencia de coñecemento que desenvolve a asociación.
Galzheimer Care anunciou esta colaboración coincidindo coa proximidade do Día Mundial do Alzheimer, que se conmemora o próximo 21 de setembro. A organización quere aproveitar esta data para chamar a atención sobre as consecuencias da enfermidade tanto para as persoas que reciben o diagnóstico como para quen as acompaña e asiste no seu día a día.
Segundo lembra a asociación, os coidados asociados ao Alzheimer poden prolongarse durante anos e requiren información, formación, acompañamento e recursos adaptados ás diferentes etapas da enfermidade. Por este motivo, defende que a atención non se limite á persoa diagnosticada, senón que teña en conta tamén as necesidades da súa contorna máis próxima.
A entidade reivindica así unha visión “integral” do Alzheimer, ao considerar que a enfermidade modifica non só a vida de quen a padece, senón tamén as dinámicas familiares e os coidados que precisa ao seu redor. Nesa liña, Galzheimer Care considera necesario combinar a evolución da investigación biomédica con medidas que faciliten ás familias ferramentas para afrontar o proceso.
