O novo colexio de O Milladoiro, en Ames (A Coruña), levará o nome do falecido Gerardo Fernández Albor. Así o autorizou o Consello da Xunta na súa reunión semanal, nun recoñecemento a quen foi “o primeiro presidente electo da Xunta e figura fundamental para a consolidación da autonomía“.
Baixo o seu mandato, segundo destaca a Xunta, puxéronse en marcha as primeiras políticas públicas propias, incluída a organización inicial do sistema educativo autonómico. Albor tivo, así mesmo, unha casa en O Milladoiro, preto de onde se sitúa o novo colexio. A previsión é que o centro, que actualmente está en obras, poida abrir as súas portas no curso 2027/28.
A decisión de dar o nome do falecido presidente ao colexio súmase ás diferentes homenaxes que se lle renderon a Fernández Albor, tanto ao longo da súa vida como tras a súa morte, no ámbito público e privado. De feito, este mesmo ano, o Goberno de España entregoulles aos seus familiares a Gran Cruz da Real e Distinguida Orde Española de Carlos III, concedida a título póstumo no Consello de Ministros o pasado 23 de decembro de 2025.
MÁIS DE 11,6 MILLÓNS
A Xunta indicou que inviste máis de 11,6 millóns na construción deste colexio, situado no concello de Ames, un dos de maior dinamismo demográfico de Galicia. Salienta que este é o primeiro centro deseñado de maneira íntegra con base no Plan de nova arquitectura pedagóxica, un novo modelo de centros “á vangarda, máis amplos, versátiles e respectuosos co medio ambiente para atender de maneira máis eficaz as necesidades do ensino do século XXI”.
