A Unión de Profesionais e Traballadores Autónomos (UPTA) de Compostela criticou a alcaldesa de Santiago, Goretti Sanmartín, polo “deterioro” e a “necesaria reconversión” do casco histórico da cidade, ademais da “ausencia” de políticas de emprendemento.

Nun comunicado, os autónomos santiagueses consideraron que o balance realizado pola rexedora sobre a xestión municipal ofrece unha visión “allea” á realidade que viven cada día os autónomos na cidade. Para a organización, os principais problemas da capital galega “seguen sen abordarse coa profundidade e a determinación que requiren”.

“Os autónomos composteláns continúan desenvolvendo a súa actividade nunha cidade que presenta importantes deficiencias en materia de limpeza e mantemento urbano. A imaxe de numerosas rúas, tanto do casco histórico como doutras zonas da cidade, dista moito da que debería ofrecer unha capital de referencia internacional como Santiago”, lamentaron. Tras insistir no “progresivo deterioro” do casco histórico, UPTA Compostela considera que chegou o momento de impulsar unha auténtica estratexia de reconversión da zona monumental. “Santiago recibe cada ano centos de miles de visitantes e o casco histórico debe ser a mellor carta de presentación da cidade”, engadiron.

A organización tamén bota en falta unha política municipal decidida de apoio ao emprendemento. “Santiago precisa facilitar a creación de novas empresas, atraer talento, reducir as trabas administrativas e poñer en marcha incentivos que favorezan o investimento, a innovación e a xeración de emprego. O emprendemento debe ocupar un lugar prioritario na axenda municipal se a cidade quere consolidar un modelo económico competitivo e sustentable”, subliñan.

“A realidade é teimuda. Santiago continúa perdendo traballadores autónomos mentres outras cidades avanzan. Non se pode gobernar de costas ao colectivo que constitúe o principal eixo da economía santiaguesa. Desde UPTA Compostela levamos meses reclamando a posta en marcha dun Plan Director que marque unha verdadeira planificación para o futuro da cidade, consensuada cos axentes económicos e sociais. Seguimos agardando unha resposta”, reivindicou Eduardo Abad, presidente de UPTA Compostela.