Renfe vén de incorporar na estación de Santiago de Compostela o servizo ‘Menores que viaxan sós’, unha prestación que permite que nenos e nenas realicen determinados desprazamentos ferroviarios sen a compañía dunha persoa adulta e baixo a atención do persoal de a bordo.
O servizo está dispoñible para menores con idades comprendidas entre os 6 e os 13 anos, ambos incluídos, e poderá utilizarse en determinados trens AVE que realizan a conexión entre Santiago de Compostela e Madrid.
Durante o proceso de embarque, o percorrido ferroviario e a chegada ao destino, o persoal de Renfe encárgase da atención e supervisión do menor. O obxectivo é que a viaxe se desenvolva en condicións de seguridade desde o momento no que o neno ou a nena queda baixo a responsabilidade da compañía ata a súa entrega á persoa autorizada na estación de chegada.
A inclusión de Santiago nesta prestación amplía as alternativas de desprazamento para as familias que empregan as conexións ferroviarias entre Galicia e Madrid. A capital galega súmase así ás estacións de Vigo Urzáiz e A Coruña, nas que o servizo comezou a funcionar o pasado mes de decembro.
SOLICITUDE CUN MÍNIMO DE 48 HORAS DE ANTELACIÓN
Para contratar o servizo é necesario adquirir un billete das modalidades ‘Elixe Confort’ ou ‘Premium’. A compra debe realizala unha persoa maior de 18 anos que teña a patria potestade ou a tutela legal do menor.
A petición deberá formalizarse cunha antelación mínima de 48 horas respecto da saída oficial do tren. O trámite pode facerse nas billeteiras das estacións, mediante o servizo de venda telefónica de Renfe ou a través de axencias de viaxes presenciais.
A compañía ferroviaria recomenda revisar antes da compra as condicións concretas da prestación, recollidas no apartado ‘Menores que viaxan sós’ da súa páxina web. Nesa información especifícanse os requisitos de identificación, entrega e recollida dos menores, así como os trens nos que está habilitado o servizo.
