O Complexo Hospitalario Universitario de Santiago porá en funcionamento antes de que termine o ano un novo edificio de cinco plantas e 5.300 metros cadrados, no que se investirán en total uns 22 millóns de euros.
Así o destacou este xoves o conselleiro de Sanidade, Antonio Gómez Caamaño, nunha visita na que estivo acompañado pola titular de Vivenda e Planificación de Infraestruturas, María M. Allegue, quen resaltou que se trata dun edificio “illado pero conectado” e no que se empregaron técnicas industrializadas.
En concreto, o denominado edificio ‘C’ albergará unha nova área de reprodución in vitro, unha unidade específica de mama, hospital de día, otorrinolaringología, unidade da dor e servizos de anestesia, ademais dunha área de logopedia e espazos de uso polivalente segundo as necesidades.
As obras, ás que se destinaron uns 16 millóns de euros, están terminadas e quedan tan só tarefas de limpeza, probas e equipamento –a este último fin destínanse outros 6 millóns–. O obxectivo é que se poña en funcionamento antes de que acabe 2026, segundo Gómez Caamaño, aínda que “se cadra non todas as unidades”.
Nun comunicado de prensa, a consellería destaca que o novo inmoble permitirá “concentrar nun mesmo espazo todos os recursos de diferentes servizos asistenciais”. O Sergas está a licitar os expedientes de dotación de mobiliario e equipamento electromédico que precisan as novas instalacións, segundo precisa.
EDIFICIO ‘A’
Cuestionado polas actuacións no bloque ‘A’, o conselleiro sinalou que, nese caso, está “a empezarse a traballar na redacción do proxecto”. Entre outras cuestións, o responsable de Sanidade apuntou á vontade de ampliar as urxencias e que haxa “máis quirófanos”.
Na nota, Sanidade sinala que o obxectivo é dispor o próximo ano do proxecto construtivo e resalta que a nova infraestrutura contará con cinco pisos que albergarán, ademais das urxencias, novos quirófanos, endoscopias, cirurxía maior ambulatoria e laboratorios.
