A alcaldesa de Santiago, Goretti Sanmartín Rei, participou este mércores no acto de celebración do segundo aniversario da Casa RIA, un proxecto vencellado á Fundación RIA que se consolidou nos últimos dous anos como un espazo de encontro, pensamento e actividade cultural na cidade.
Na celebración tamén interveu o presidente da Fundación, David Chipperfield, e asistiron o concelleiro de Urbanismo e Vivenda, Iago Lestegás, así como outros integrantes da corporación municipal e diversas autoridades.
Durante a súa intervención, Sanmartín puxo o foco no valor simbólico e social dun espazo como Casa RIA. “A ninguén lle escapa que cando dicimos ‘casa’ estamos dicindo moitas cousas. Que unha casa é moito máis que o material que a conforma. Hai unha parte humana en toda casa”, sinalou a alcaldesa.
A rexedora felicitou a Fundación polos dous anos de traxectoria dun proxecto que cualificou como “proveitosos” e destacou o papel que a Casa RIA desenvolve en Santiago de Compostela como lugar de acollida, investigación, difusión cultural, lecer e reflexión pública. Segundo apuntou, trátase dun espazo que contribúe á vida urbana da cidade desde unha perspectiva aberta á participación e ao debate.
Sanmartín tamén subliñou a dimensión ambiental e educativa da iniciativa. Neste sentido, referiuse á horta propia da Casa RIA como exemplo de sustentabilidade e como ferramenta para achegar ás crianzas ao cultivo, ao produto de proximidade e á relación co territorio.
A alcaldesa enmarcou ademais o proxecto na súa contorna urbana, con referencias a espazos próximos como Virxe da Cerca ou Belvís, e reivindicou o valor do patrimonio construído e da reutilización de edificios existentes. Ao falar do inmoble que no pasado funcionou como sanatorio, defendeu que “o vello non significa obsoleto, nin desprezable nin descartable”.
