O Centro de Investigación Interdisciplinaria en Tecnoloxías Ambientais da USC (Cretus) avanza no tratamento de augas para frear a contaminación invisible e a resistencia aos antibióticos. O investigador Matías Rivadulla Cora abordou o desenvolvemento e a avaliación de sistemas innovadores para mellorar a eliminación de contaminantes emerxentes das augas residuais urbanas, concretamente, compostos farmacéuticos e xenes de resistencia antimicrobiana.
Na súa tese de doutoramento, o científico trata tanto sistemas centralizados de depuración como novas estratexias descentralizadas orientadas á reutilización segura da auga e á redución do impacto ambiental destes contaminantes. O traballo, que recibiu a cualificación de sobresaliente cum laude, foi dirixido polos catedráticos Juan Manuel Garrido Fernández e Francisco Omil Prieto, dentro do grupo de Biotecnoloxía Ambiental (BioGroup).
A crecente presenza de antibióticos, analxésicos, hormonas ou xenes de resistencia nas augas residuais converteuse nun dos principais retos ambientais e sanitarios a nivel global. O aumento do seu consumo, unido ás limitacións dos sistemas convencionais de depuración, favorece a súa liberación ao medio natural e incrementa o risco de propagación de bacterias súper resistentes. Neste contexto, a Unión Europea reforzou recentemente as esixencias sobre o tratamento de augas urbanas e a súa reutilización segura.
A investigación combinou estudos en depuradoras reais coa experimentación a escala piloto na EDAR de Silvouta (Santiago de Compostela), para sistemas centralizados, e no Centro de Negocios de Porto do Molle (Nigrán) para a configuración descentralizada baseada na separación de augas negras e grises. Os resultados demostraron que os sistemas biolóxicos avanzados poden mellorar significativamente os rendementos, logrando eliminar máis do 90% dalgúns compostos farmacéuticos e reducindo de forma notable a presenza de bacterias resistentes sen necesidade de grandes gastos de infraestrutura.
FINANCIAMENTO
A investigación desenvolveuse no Cretus, centro da Rede CIGUS cofinanciado pola Unión Europea (Galicia FEDER 2021-2027), no marco dos proxectos europeos e nacionais PRESAGE e ANTARES, centrados no estudo de contaminantes emerxentes e novas estratexias para a protección dos recursos hídricos.
O proxecto PRESAGE está financiado a través da convocatoria internacional ERA-NET AquaticPollutants, mentres que ANTARES conta co apoio da Axencia Estatal de Investigación. Ademais, parte dos sistemas descentralizados avaliados na tese desenvólvense coa colaboración da empresa FCC Aqualia, favorecendo a transferencia de coñecemento e a aplicación práctica do estudo. Os resultados deron lugar a varias publicacións científicas en revistas internacionais de alto impacto como Science of the Total Environment, Journal of Hazardous Materials e Journal of Environmental Management.
