Santiago de Compostela conta desde este venres cun novo mecanismo institucional deseñado para protexer a un dos colectivos máis vulnerables da sociedade. O Tribunal de Instancia de Santiago impulsou a creación dun grupo de traballo multidisciplinar cuxo obxectivo prioritario será a detección precoz e o tratamento eficaz das situacións de malos tratos a persoas maiores. O acto de constitución oficial estivo presidido pola maxistrada Sandra María Igrexas.
Este novo equipo de intervención integra a representantes de diversas administracións e organismos que operan nos eidos da protección social, sanitaria, policial e xudicial. Durante este primeiro encontro, os participantes puxeron en común a necesidade urxente de reforzar a colaboración directa entre todas as institucións implicadas co fin de ofrecer respostas áxiles e adaptadas á gran complexidade que presentan estes sucesos, nos que conflúen factores de índole social, sanitaria, familiar e xudicial.
COLABORACIÓN ANTE A COMPLEXIDADE DOS CASOS
Á xuntanza tamén asistiu o subdelegado do Goberno, Julio Abalde, quen recalcou a transcendencia de poñer en marcha esta canle de coordinación para poder ofrecer unha resposta que sexa á vez eficaz, humana e integral fronte a calquera clase de violencia, abuso ou desamparo cara á vellez.
Julio Abalde quixo subliñar o compromiso do Goberno de España coa protección integral das persoas maiores, así como coa mellora da articulación institucional necesaria para combater con firmeza os contextos de vulnerabilidade. O representante estatal fixo fincapé en que este reforzo é especialmente vital naqueles casos nos que as vítimas atópanse nunha situación de total dependencia respecto dos seus propios coidadores directos.
MECANISMOS PARA UNHA ATENCIÓN MÁIS RÁPIDA
Segundo destacou a Subdelegación do Goberno, a posta en marcha definitiva deste grupo de traballo multidisciplinar vai permitir avanzar de xeito substancial no intercambio de información e de recursos entre todas as institucións que forman parte do proxecto. Esta rede de traballo conxunta incluira novos mecanismos de actuación coordinada coa firme finalidade de garantir un protocolo de atención que sexa moito máis rápido, eficaz e integrador para as vítimas na capital galega.
